Guha ubushobozi imiryango ikennye biyiha imbaraga zo kugira amahoro arambye no gusubizwa agaciro baremanywe.

Bimwe mu bikorwa bya Komisiyo y’Ubutabera n’Amahoro ya Arikidiyosezi ya Kigali ikorera abagenerwabikorwa bayo harimo kongerera ubushobozi imiryango ikennye imbaraga kugirango bagire amahoro arambye kandi basubizwe agaciro baremanywe ndetse bibafashe kubaho batekanye.

Padiri Twizeyumuremyi Doantien umuyobozi wa Caritas Kigali na Komisiyo y’ubutabera n’Amahoro muri Arikidiyosezi ya Kigali avuga ko umutekano wa muntu ukubiye mu magambo atatu y’ingenzi  ariyo Iterambere, amahoro n’ubutabera.

Avuga ko ya mahoro arushaho gusendera iyo wongeyeho ijambo rya kane : Kumenya Imana. Aya magambo uko ari atatu, abantu bayumva ku buryo butandukanye ariko Kiliziya iyasobanura ishingiye ku Ivanjili ya Yezu Kristu.

« Umutekano nk’uyu rero uboneka iyo muntu afite ibyangombwa, nibura by’ibanze byo kubaho, akaba afite amahoro arambye kandi ntawe umubangamiye ngo amubuze uburenganzira bwe » Padiri Twizeyumuremyi Donatien.

Muri ibi bikorwa byose, Kiliziya iharanirako ko umuntu yabaho neza atekanye kuri Roho no ku mubiri. Ibinyujije mu murimo wo kwamamaza Ingoma y’Imana mu bantu. umuntu yakubira ibyo bikorwa mu byiciro bitatu : Kwigisha Ijambo ry’Imana, gutagatifuza imbaga y’Imana ikoresheje amasakaramentu n’ibindi bikorwa by’ubuyoboke ndetse no kuyobora Umuryango w’Imana mu nzira igana Ingoma ihoraho y’Imana.

Kimwe mu bintu umuntu yifuza buri munsi, kugeza avuye kuri iyi si,ni ukubona atabayeho nabi mu bukene  (misere), akaba afite ibimutunga bihagije kandi byiza, akaba afite ubuzima, akagira akazi gahoraho kandi keza (emploi stable et decent),akagira kandi aho yumva nawe afite inshingano (responsabilités), akabaho nta gatunambwene (hors de toute oppression), akabaho nta kibangamiye agaciro ke n’ubwisanzure bwe, bikaba akarusho rero afite ubumenyi buhagije kandi akeneye (être plus instruit), mu magambo make umuntu ashaka kubaho afite icyo akora , afite ibyo azi kandi atunze ibyo akeneye.

KOMISIYO Y’UBUTABERA N’AMAHORO YINJIYE MURI GAHUNDA Z’ITERAMBERE

Nta terambere, amahoro aba make, nta mahoro kandi iterambere ntirishoboka. Papa Paul VI niwe wavuze mu nyandiko ya Populorum Progressio ati « Iterambere ni irindi zina ry’amahoro ». Abanyarwanda nabo mu buhanga bwabo bakavuga bati « Abasangiye ubusa bitana ibisambo »

 Komisiyo y’Ubutabera n’Amahoro yinjiye muri gahunda yo gufasha imiryango kwiteza imbere bitewe nuko yabonaga abo ifasha mu kubaka amahoro, bafite inzitizi cg se ibyonnyi by’ayo mahoro. Kimwe muri ibyo byonnyi rero kikaba ubukene. Mu bihe bya mbere, iyi Komisiyo yibanze cyane ku bikorwa by’ubumwe n’ubwiyunge, kubaka amahoro, gukemura amakimbirana, kurenganura abarengana, gufasha abahuye n’ibibazo by’ihungabana bisaba ibikorwa by’isanamitima.

Uko twagendaga dufasha muri ibyo bikorwa ,niko twagiye tubona ko hari kiriya cyonnyi cy’ubukene gishobora gusenya ibyo twubatse, cg se kikaba umuzi w’ibyo bibazo twari duhanganye nabyo.Tugasanga abo turimo guherekeza mu rugendo rw’ubumwe n’ubwiyunge,uwabahuriza kubikorwa by’iterambere barushaho kunga ubumwe no gusabana ;ingo twafashije gukemura amakimbirane, ugasanga akenshi yaturutse kugusangira ubusa,bikaba ngombwa ko tubafasha gukemura icyo kibazo cy’ubukene kibaryanisha ;abafashijwe mu bikorwa by’isanamitima rimwe na rimwe ugasanga udashobora kubaka roho ngo ureke umubiri, maze bikaba ngombwa ko tugendera kuri ya mvugo igira iti « Roho nziza mu mubiri muzima ».

Ariko by’umwihariko, ubwo Komisiyo y’Ubutabera n’Amahoro yatangiraga gukorana n’imiryango muri gahunda yo gukumira ihohoterwa rikorerwa mu miryango/ngo niho yabonye ko ntamahoro ndetse nta n’agaciro gakwiriye ikiremwamuntu umuntu aba afite, mu gihe cyose adafite ubushobozi byibuze bwo kugira ibyo yimarira by’ibanze bikenerwa mu buzima. Wa mugani w’ikinyarwanda twavuze haruguru tuti « abasangiye ubusa bitana ibisambo »nibwo twabonye ko ibyo uvuga aribyo koko.

Ibi byagiye bigaragara aho hari amakimbirane yagiye agaragara mu muryango mu kuyasesengura bikagaragara ko aturuka ku bucyene bukabije; aho umugabo ahohotera umugore kubera ko ntacyo yinjiza mu muryango cyangwa se na ducye umwe muribo azanye mugenzi we akamushinja ko hari ibindi bitari mu nyungu z’umuryango aba yayakoresheje.

Ikindi nuko akenshi iyo umuntu abayeho mu bukene bukabije abandi baramusuzugura ugasanga bamufata nk’umuntu udafite agaciro; ibi bigatuma bamuheza muri gahunda nyinshi kandi zakamugiriye akamaro mu buzima bwe.  Aha niho Komisiyo yatangiye gushishikariza abagenerwabikorwa bayo kwibumbira mu matsinda yo kwizigama no kugurizanya.

Bimwe mu bikorwa by’iterambere CDJP ikorana n’abagenerwabikorwa bayo

Amatsinda yo kwizigama no kugurizanya

Padiri Twizeyumuremyi avuga ko mu bikorwa bya CDJP Kigali yagiye ikunda gukorana n’abantu mu buryo burushaho kubegeranya kugirango bakomeze ubumwe bwabo.

Hari abafashijwe muri gahunda z’ubwiyunge, bagahurizwa hamwe mu matsinda abafasha gukora ibikorwa by’isangirabuzima, abo duherekeza mu bikorwa by’isanamitima, tukagira amatsinda yo kuganirira hamwe bagafashanya gukira (Therapie de groupe) n’ibindi.

Ibyo byatumye tubonako uburyo bwo gufashiriza abantu mu matsinda bugira umusaruro mwinshi kandi mwiza. Abantu bakigana ibikorwa byiza, cyangwa  se hakabaho kwigira umwe ku wundi.

Ku bw’iyo mpamvu rero n’ibikorwa by’iterambere twahisemo kubitangirira muri aya matsinda yo kwizigama no kugurizanya.Aya matsinda aba agizwe n’abantu babanjwe guhuzwa na bya bikorwa twavuze haruguru, tukaza gusanga bafite ikibazo by’amikoro make ashobora kuba intandaro y’ibindi bibazo byinshi.

Nk’andi matsinda yo kubitsa no kugurizanya yose rero, abayagize bumvikana igihe bazajya bahurira, ndetse n’icyo bazajya batanga nk’umugabane wo kubitsa.Bakagena amategeko y’ingenzi bazagenderaho,kandi bakitoramo n’abayobozi babafasha.Ikindi cyakunze kwiyongera ku matsinda y’abagenerwabikorwa ba CDJP Kigali nuko twakunze kugira abaterankunga bumvako ari ngombwa ko ayo matsinda agenerwa inkunga y’amafaranga yabafasha mu ntangiriro,aya mafaranga niyo bagenda bongeranya n’imigabane yabo kugira ngo babone igishoro gihagije.

Ubu Komisiyo y’Ubutabera n’Amahororo ikorana n’amatsinda 86 agizwe n’abantu 1420. Abanyamuryango bayo matsinda ahanini ni abadamu bo muri Paruwasi ya Shyorongi n’iya Kabuye bagiye bahura n’ibikorwa by’ihohoterwa rishingiye ku gitsina ndetse n’abahinzi baciriritse bo muri Paruwasi ya Ruhuha mu Murenge wa Ngeruka.

Batangiye bizigama amafaranga ari hagati ya 600 na 1000 mu kwezi bakajya bayagurizanya bongeyeho inyungu y’ amafaranga hagati ya 5%-15% .

Kuri aya mafaranga yabo bizigama,CDJP yabahaye inkunga igera miliyoni mirongwitatu n’eshanu n’ibihumbi maganarindwi na bitatu n’amafaranga ijana na mirongwicyenda n’icyenda y’u Rwanda (35.703.199Frw) kugirango bagure imishinga yo kwiteza imbere bafite. Imishinga bakora igihe bagujije mu matsinda yabo, iba itandukanye bitewe n’icyo buri wese ashobora gukora.

Imwe muri iyo mishinga ijyanye n’ibikorwa by’ubuhinzi, ubworozi bw’amatungo magufi ndetse n’ubucuruzi buciriritse.

Kugeza mu mpera za 2019, umutungo w’ayo matsinda yose wari umaze kugera kuri miliyoni ijana na mirongo ine n’eshanu n’ibihumbi magana atatu na mirongo inani na birindwi na magana atandatu na mirongo icyenda n’atatu (145,387.693 Frw).

2. Ubufasha mu iterambere ry’umuryango ku bahinzi bato

Abagenerwabikorwa 500 harimo abagore 396 n’abagabo 104 bo muri Paruwasi ya Ruhuha bibumbiye mu ma koperative abiri bahawe bafashijwe mu iterambere ry’umuryango binyujijwe mu bikorwa by’ubuhinzi birimo ibi bikurikira :

• Imbuto n’ibikoresho bitandukanye by’ubuhizi harimo amasuka, ibitiyo, imashini zivomerera, ubunyobwa, ibigori, ibishyimbo, amashu, beterave, ibitunguru, inyanya n’imbuto ziribwa
• Bahawe amahugurwa atandukanye ku bijyanye n’ubuhinzi bibafasha kubona umusaruro utubutse ;
• Bahawe kandi ihene 1000 ni ukuvuga ihene ebyiri ku rugo kugirango zibafashe kubona ifumbire.
• Abantu 370 bishyuriwe ubwisungane mu kwivuza.
• Abahinzi bato bo muri Paruwasi ya Ruhuha bubakiwe ikigega cyo guhunikamo imyaka gifite ubushobozi bwo guhunika toni 360 z’imyaka, iki kigega cyubatswe mu rwego rwo gufasha abahinzi bato kubona imbuto igihe cy’ihinga ; cyatwaye amafaranga angana na 000.000 Frw.
• Aba bahinzi kandi bubakiwe uburyo bwo kuhirira imyaka hakoreshejwe imirasire y’izuba bitwara amafaranga angana na 22.000.000 Frw. Ubu buryo bwo kuhira bwatumye umusaruro wiyongera ku buryo abagenerwabikorwa 312 umusaruro wiyongereye ku buryo bugaragara, 107 muribo bafite undi mushinga bakora wakomotse kubyo bakuye mu buhinzi naho 205 bafite byibura imishinga ibiri.

Binyujijwe mu migoroba y’ababyeyi imidugudu itatu yo mu Kagali ka Munyana,Umurenge wa Minazi n’imidugudu itatu yo mu Kagali ka Jango mu murenge wa Ruli bahawe amafaranga angana na miliyoni n’ibihumbi maganatanu (1,500,000 Frw) bagura ihene zo kujya borozanya.

Iterambere ry’urubyiruko

Muri iyi minsi Komisiyo y’ubutabera n’amahoro ya Kigali (CDJP), irimo guhangana no kubona uko yafasha urubyiruko rufite ibibazo bitandukanye bituruka cg biremerezwa n’ubukene. Muri aba harimo abakobwa babyariye iwabo, abafite ibibazo byo kubura akazi kandi bakaba badafite n’amasambu ahagije yo guhingamo. Urugendo ruracyari rureru kuri iyi ngingo kubera amikoro make.

Ariko gushaka niko gushobora,dufatanyije n’uru urbyiruko hari ibizashoboka.   Ubu abamaze gufashwa bagera kuri 40 barimo abakobwa babyariye iwabo boo muri Paruwasi ya Ruli na Munyana bahawe amahugurwa ku kudoda banahabwa no kubona ibikoresho by’ibanze.

Iterambere ry’umugore ni k’imwe mu ngamba zo kugabanya amakimbirane mu ngo. Muri ibi bikorwa byose byavuzwe haruguru, hagiye hitabwa ku iterambere ry’umugore, hagamije gukemura amakimbirane akunze kugaragara mu ngo.   

Ibyo biterwa nuko ibibazo byinshi byo mu ngo, usanga bifite aho bihuriye n’ubukene bugaragara cyane ku mugore.Ubu bukene bwatumaga ubuzima bwe bwose asa naho abuteze ku mugabo, noneho kuba amusaba byose akeneye, bigatuma umugabo amwinuba ndetse akamufata nkaho ntacyo amaze mu rugo.

Ibi biri mubituma, muri izo ngo zirangwamo amakimbirane, kuko umugore w’umubukene afatwa nk’ikintu aho gufatwa nk’umuntu.

Gufasha uyu mugore kwiteza imbere rero, byagiye bituma agarura agaciro mu maso y’umugabo ndetse n’umuryango muri rusange ndetse nawe ubwe akigirira icyizere. Abagore binjiye uri iyi gahunda neza, bagiye ndetse banagirirwa icyizere na sosiyete y’aho batuye, ugasanga babatorera kugira inzego bayobora aho batuye ibyo bikaba ikimenyetso ko kwiteza imbere  byabasubije ijambo mu bandi, babasha kwitinyuka no gutinyuka, bigarurira icyizere.

Umusaruro w’ibi bikorwa by’iterambere mu kubaka amahoro n’ubutabera

• Kwivana mu bukene ,bakabona ibyo bakeneye by’ibanze mu muryango byatumye bagira amahoro y’umutima ,muribo baratekana.
• Byatumye bigirira icyizere, bumva nabo ari kimwe na’abandi,ntibongera kugira ipfunwe ryo kugaragara mu bandi(Hari abatarashoboraga kujya mu isengero kuko nta mwenda wo kwa mbara bafite)
• Byagaruye amahoro mu ngo zarimo amakimbirane.Kuko noneho buri wese yerekanye ko hari icyo amariye umuryango.Umurimo utanga inyungu wamusubije agaciro.
• Umugore wateye imbere yigiriye icyizere kandi n’abandi barakimugirira.Ntakibehshejweho no gusaba icyo akeneye cyose,ahubwo nawe agira uruhare mu kubonera umuryango ibyo ukeneye
• Ntibongeye kuba umutwaro ku buyobozi cg se kubaturanyi,ahubwo babaye isoko y’ibisubizo(bitangira mutuweli, biyubakira ubwiherero,etc)
• Bumvise ko Imana itabibagiwe ,bayiha umwanya mu buzima bwabo.Mu bikorwa bakoranye na CDJP ,babonyemo ukuboko kw’Imana.
• Umubano mwiza n’andi madini n’amatorero kuko ibikorwa bya CDJP ntibivangura idini,akarere,ubwoko n’ibindi.

Umwanditsi mukuru