CARITAS KIGALI

Urugendo rwa Musenyeri Kambanda kuva ahawe ubupadiri kugera kuri Cardinal

Arikidiyosezi Gatolika ya Kigali
Cardinal Antoine Kambanda

AbaKirisitu benshi bakunze kwibaza ku buzima bwa Cardinal Antoine Kambanda, n’imwe mu mirimo yakoze ngo agere ku rwego rwo kuva kuri Musenyeri akagirwa Karidinari ndetse abenshi bifuje ko twababwira imwe mu mibereho ye.

Musenyeri Kambanda Antoine, Arkiyepiskopi wa Kigali, yavukiye muri Paruwasi ya Nyamata mu Karere ka Bugesera, ku wa 10 Ugushyingo 1958. Akaba yarujuje imyaka 62 tariki ya 10/11/2020.

 Yakurikiye inzira yo kwiha Imana, nubwo atari urugendo rwamworoheye bitewe n’amateka igihugu cyanyuzemo. Irondabwoko, ivangura no kwica Abatutsi ntibyatumye akurira mu gihugu, kuko ku myaka itandatu gusa umuryango we wahungiye mu Burundi nyuma ukajya muri Uganda.

Mu 1975, habayeho igisa n’icyizere cy’amahoro mu Rwanda, umuryango wa Mgr Kambanda, urahunguka ariko we aguma muri Uganda yiga. Mu 1994, umuryango we wose wishwe muri Jenoside yakorewe Abatutsi.

Yahawe ubupadiri na Papa Jean Paul II

Ku wa 7 Nzeri 1990 wari umunsi ukomeye, ubwo Papa Yohani Pawulo II yakandagiraga ku butaka bw’u Rwanda, mu ruzinduko abakirisitu Gatolika bafata nk’urw’amateka kugeza ubu.

Muri urwo ruzinduko rwamaze iminsi ibiri, ku wa 8 Nzeri 1990 Papa Yohani Pawulo II yahaye ubusaseridoti abadiyakoni 31, mu misa yabereye i Mbare, ni mu Murenge wa Shyogwe mu Karere ka Muhanga.

Barimo 25 bo mu Rwanda na batandatu bo muri Repubulika Iharanira Demokarasi ya Congo. Benshi muri bo ubu ntibakiriho, ariko mu bakiriho harimo babiri babaye abasenyeri. 

 

Kalidinali Antoine Kambanda avuga ko bahabwa ubusaserdoti wari umunsi wamubereye urwibutso rukomeye ku butumwa yahawe.

Ati "Wari umunsi ukomeye cyane kuri twe, byabaye umugambi ukomeye wateguwe n’Imana, byonyine kuba Papa aribwo bwa mbere yari akandagije ikirenge ku butaka bw’u Rwanda akaduha ubusaserdoti.”

"Ubu noneho akarusho ni uko atakiri Papa gusa ahubwo yagizwe Umutagatifu, nk’umuntu watunganiye Imana, icyegera cyayo, aratuvuganira, ikindi twinjiye mu masekuru y’uwabuduhaye, nawe yabuhawe n’uwabumuhaye, ibisekuru bikagenda bikurikirana gutyo kugeza kuri Yezu Kristu n’intumwa, ukaba winjiye mu murongo w’Ubusaserodoti. Ibi byose ni ibintu dushimira Imana."

 

Agihabwa ubusaserdoti, Karidinali Kambanda yatangiye ubutumwa bwe nk’umwarimu akaba n’ushinzwe amasomo mu Iseminari Nto ya Ndera i Kigali.

Kuva mu 1993 kugeza mu 1999 yagiye gukomereza amasomo muri Kaminuza i Roma, ahakura impamyabushobozi ihanitse muri Tewolojiya. Kuva mu 1999 kugera mu 2005 yabaye Umuyobozi wa CARITAS ya Arkidiyosezi ya Kigali, aba n’Umuyobozi wa Komisiyo y’Ubutabera n’amahoro muri Arkidiyosezi ya Kigali.

Yabifatanyaga no kwigisha mu Iseminari Nkuru ya Nyakibanda, akaba n’Umuyobozi wa Roho mu Iseminari Nkuru ya Rutongo. Kuva 2005 kugeza 2006 yabaye Umuyobozi wa Seminari Nkuru ya Kabgayi, mu 2006 kugera 2013 yagizwe umuyobozi wa Seminari Nkuru ya Nyakibanda.

Ku itariki ya 3 Gicurasi 2013 nibwo Nyirubutungane Papa Fransisko yamutoreye kuba Umushumba wa Diyosezi ya Kibungo, tariki 20 Nyakanga 2013 nibwo yahawe inkoni ya Gishumba. Intego ye ni “Ut vitam habeant” bivuze ngo “Bagire ubuzima”.

Mu Ugushyingo 2018 nibwo Umushumba wa Kiliziya Gatolika ku Isi, Papa Francis, yemereye Musenyeri Thadée Ntihinyurwa wayoboraga Arkidiyosezi ya Kigali kujya mu kiruhuko cy’izabukuru, amusimbuza Karidinali Kambanda Antoine, wayoboraga Diyosezi ya Kibungo, ubu aziyobora zombi kuko Kibungo itarahabwa umushumba wihariye.

Jenoside yamutwaye umuryango adahari

Mu 1994, Umuryango wa Karidinali Kambanda wose wishwe muri Jenoside. Wari ugizwe n’abantu icyenda; abahungu batandatu, umukobwa umwe n’ababyeyi.

Mu munani bari mu Rwanda, harokotse umwe gusa abandi bose barishwe. Hari kandi ba nyirasenge, nyirarume, babyara n’abandi bo mu muryango mugari wa Karidinali Kambanda bishwe.

Jenoside yakorewe Abatutsi mu 1994 itangira, Musenyeri Kambanda yigaga i Roma, ibyaberaga mu Rwanda byose yabireberaga kuri televiziyo, agashengurwa n’uburyo imiryango ye iri mu kaga.

Yagize ati" Birababaza iyo utekereje ko ari n’abantu bacu tuzi twabanye, ababyeyi, abavandimwe, inshuti, abaturanyi bikababaza cyane ariko nk’abakirisitu tukiyambaza Imana kuko mu bikomeye byose biturenze twiyambaza Imana tukabishyira mu maboko yayo."

"Imana yaradufashije haba ubwitange bw’abantu b’intwari bayihagaritse. Dutashye rero, umuntu yagendaga abaririza umuntu warokotse kwa kanaka umuntu muhuye bwa mbere akaremererwa no kukubwira uko byagenze, uwacitse ku icumu mbere y’uko mugira ikindi muvugana wabonaga ko hakiri igihu mutarashyikirana kugeza igihe akubwiriye amateka ye."

 

Mu minsi ishize Kambanda yabaye cardinal

Ku wa 25 Ukwakira nibwo Umushumba wa Kiliziya Gatolika ku Isi, Papa Francis, yagize Cardinal Musenyeri Antoine Kambandaaba uwa mbere ubashije kugera kuri iyo ntera mu mateka ya Kiriziya Gatolika mu Rwanda.

Nyuma y’isengesho rizwi nka Angelus ryasomewe ku rubuga rwa Mutagatifu Petero i Roma kuri icyo Cyumweru saa Sita, nibwo Papa Francis yifashishije idirishya ry’ingoro ye, yasomye mu ijwi riranguruye amazina y’abepiskopi 13 bagizwe ba cardinal, barimo Musenyeri Antoine Kambanda.

Yari inkuru idasanzwe kuri Kiliziya Gatolika mu Rwanda kuko iyi nkuru yakiranywe ubwuzu n’ab’ingeri zitandukanye kugeza no ku bayobozi bakuru b’igihugu batewe ishema n’intambwe Musenyeri Kambanda yateye akaba Karidinali.

Perezida Paul Kagame yifurije ishya n’ihirwe Arkiyepiskopi wa Kigali, Musenyeri Antoine Kambanda, uheruka kugirwa cardinal na Papa Francis, inshingano azatangira ku wa 28 Ugushingo 2020.

Yagize ati “Mu izina ryanjye bwite no mu izina ry’Abanyarwanda bose, turakwifuriza ishya n’ihirwe mu mirimo mishya, nka Karidinali wa mbere mu mateka y’u Rwanda. Iri kamba wambitswe, ni ishema kuri wowe no kuri Kiliziya Gatolika y’u Rwanda. Ni agaciro gakomeye ku Banyarwanda bose no ku gihugu.”

Perezida Kagame yavuze ko kuba Musenyeri Kambanda agizwe Cardinal nyuma y’imyaka ibiri abaye Arkiyepiskopi wa Kigali, ari ikimenyetso cy’impano afite mu kunoza umurimo w’Imana.

Yakomeje ati “Ni ikimenyetso kandi cy’uko Kiliziya Gatolika y’u Rwanda ikomeje kuba ubukombe, nyuma y’imyaka 120 igeze mu Rwanda. Kiliziya Gatolika ikomeje kugira uruhare mu kubaka igihugu nyuma ya Jenoside yakorewe Abatutsi mu 1994, cyane cyane mu isanamitima, kunga no kubanisha Abanyarwanda.”

“Ikomeje no kugira ubufatanye na leta mu guteza imbere uburezi, ubuzima, n’imibereho myiza by’Abanyarwanda. Ibi byose ni ibyo kwishimira. Turabizeza ubufatanye mu mirimo yanyu, by’umwihariko na Kiliziya Gatolika muri rusange.”

 

Biteganywa ko Musenyeri Kambanda azakomeza kuyobora Arkidiyosezi ya Kigali kuko aba ari Musenyeri nk’abandi nubwo afite ikindi cyiciro cyisumbuye abarizwamo, nk’uko na Papa ari Musenyeri.

 

Kugira ngo umuntu abe cardinal biri mu bushake bwite bwa Papa kuko nta tora ribaho, bigakorwa mu busesenguzi bwe, akitoranyiriza abamufasha. Ba Cardinal nibo batora ba Papa, bivuze ko buri cardinal aba ari umukandida.

Ba cardinal 13 bashya baheruka kwemezwa na Papa Francis barimo Musenyeri Kambanda, bazimikwa ku wa 28 Ugushyingo 2020.

 

Barimo icyenda bafite munsi y’imyaka 80 ari nabo bemererwe kwitabira inama nkuru y’aba cardinal igihe baba bagiye gutora Papa (conclave) bakanatora, n’abandi bane bayirengeje, bivuze ko bo bataba bemerewe gutora.

Biteganywa ko Cardinal Kambanda azahita ahabwa imyambaro itukura iranga ba

Cardinal. No mu gushyira umukono ku nyandiko, azaba yandika amazina ye nka Antoine Cardinal Kambanda, izina ry’urwego rwe rize hagati y’amazina asanganywe.

 

Umwanditsi

 

 


Byanditswe : tariki ya 12 Ugushyingo 2020 saa 16:09:34, ubu
Uwabitangaje : Umwanditsi Mukuru

֩ Ibitekerezo kuri iyi nkuru (0)

Nta gitekerezo kiratangwa kuri iyi nkuru, tanga agatego ube uwa mbere kugira icyo ubivugaho

Umugenzuzi

Funga Amazina:

Ijambo ry'ibanga:

Ohereza igitekerezo

Funga       
     

-
-


B I U URL    :) :( :P :D :S :O :=) :|H :X :-*

Ohereza ifoto (itarengeje 200 kb), ariko si ngombwa

Andika iri jambo ry'igenzura:   11df8