Caritas ya Kigali yigishije ababyeyi “Guteganya Imbyaro” mu buryo bwa kamere kugirango babafashe kubyara abo bashoboye kurera no gufasha reta muri gahunda zayo zo kwigisha abaturage guteganya imbyaro.

Mu nama nyunguranabitekerezo yabaye tariki ya 8/12/2017 hamurikwa ibyagezeho n’umushinga Umuryango uboneye na Turengere Ubuzima bw’Abana n’Ababyeyi yahuje inzego zose zifite mu nshingano zabo kwita ku buzima, Caritas ya Kigali kubufatanye na Caritas yagaragaje uburyo ifasha abaturage “Guteganya Imbyaro” mu buryo bwa kamere kugirango babashe kubyara abo bashoboye kurera.

Caritas ya Kigali ibinyujije mu mubigo nderabuzima bya kiriziya Gaturika bikorera muri Arikidiyoseze ya Kigali muri uyu  mwaka wa 2017 bigishije imiryango igera ku 2383 ziyongera  ku ngo zisanzwe zikoresha ubu buryo zingana ni 4379 muri gahunda yo guteganya imbyaro hakoresheje uburyo bwa kamere.

Ababyeyi bigishijweuburyo bushingiye kumenya imiterere n’imikorere y’imyanya myibarukiro (imyanya igenga kororoka ) no kuyubahiriza, bunashingiye no kumenya n’ibijyanjye n’uburumbuke n’ibitari iby’uburumbuke biboneka mu kwezi k’umugore .

Bigishijwe kandi no kwifata mu gihe cy’uburumbuke bw’umugore iyo abashakanye batifuza gusama, bikaba ari uburyo buha umushyikirano mpuzabitsina w’abashakanye agaciro kawo kuko bikorwa mu bwumvikane bwa bombi.

Umuryanago wa NDAYISABA Bernard na MUKAMPUNGA Ernestine bashakanye tariki ya 6/12/1999 bafite abana 4 bakaba batuye mu karere ka Kamonyi, umurenge wa Rugarika akagari ka Kagangayire, umudugudu wa Sheli, batangiye uburyo bwo guteganya imbyaro bakoresheje uburyo bwa kameremu kwezi kwa 11/2003.

Impamvu  bahisemo ubu buryo  bari barabyigishijwe mu nyigisho zitegura isakaramentu ry’ugushyingirwa bahitamo ko aribwo buryo bazakomeza kuko bujyanye n’imyizerere yabo.

NDAYISABA Bernard na Mukampunga ERNESTINE bakoresheje uburyo bwo Guteganya Imbyaro

Icyo byabamariye nuko umubano wabo warushijeho kuba mwiza, bamenya akamaro k’ibiganiro mu mubano w’abashakanye kuko byabasabaga kuganira kenshi mu buryo bunyuranye. NDAYISABA Bernard ubwe yemeza ko byatumye arushaho kumenya imikorere y’umubiri w’umugore we arushaho kumushimira ndetse no gushimira Imana ko yamuhaye icyo yayisabye.

Ati « Numvise agaciro k’umushyikirano mpuzabitisina w’abashakanye kubera uburyo dukoresha budusaba guhura mu bihe nyabyo kandi birushaho kuduhuza kuko tuba dukumburanye ».

Undi muryango wakoresheje ubu buryo ni urugo rwa Uwimbabazi Samuel na Ntumvugirumukobwa Berancille barashakanye mu mwaka wa 2000 binjira muri gahunda yo guteganya imbyaro bakoresheje ubu buryo bwa kamere  mu mwaka wa 2005.

Bombi bumvikanyeho ko bazabyara abana 4, uwa mbere bamubyara mu mwaka wa 2000, uwa kabiri muri 2002, uwa gatatu 2004 ndetse uwa kane muri 2005. Uyu wa gatatu yitabye Imana akivuka. Aha bari bariyemeje ko hagati y’umwana n’undi hagombaga kubamo ikinyuranyo cy’imyaka 3 cyangwa 5.

Ibi ntibabigezeho bituma bashaka kumenya icyo bakora, nuko rimwe babyumva kuri radiyo ko mu mavuriro ya kiriziya hari uburyo bwo guteganya imbyaro mu buryo bwa kamere kandi ari bwiza kubabukoresha gusa busaba gukurikiza ibisabwa.

Ati « twagiye ku kigo nderabuzima badusobanurira bihagije uburyo bwose bwo guteganya imbyaro kugeza ubwacu twihitiyemo buno buryo bwa kamere ». 

Uwimbabazi Samuel na Ntumvugirumukobwa Berancille nabo bakoresha uburyo bwa kamere

Biyemerera ko nta ngorane bagize haba mu gutangira ubu buryo kugeza nubu ahubwo ko byabafashije kongera urukundo rwuzuye mu mibanire yabo n’intego bari barihaye bazigezeho zo kurera abo Imana yabahaye bakabakuza kandi bakababonera ibikenerwa byose.

Bakaba barakuyemo isomo rikome ryo gufata ibyemezo by’ubuzima no gusobanurira abandi ibyiza byo gukoresha ubu buryo mu Guteganya imbyaro.

Uburyo bwa kamere bukubiye mu byiciro bibiri by’ingenzi bikurikira :

1.Uburyo bushingiye ku kugenzura ibimenyetso by’uburumbuke n’ibitari uburumbuke biboneka mu kwezi ku mugore : Harimo uburyo bwo kugenzura ururenda, uburyo bwo gupima ubushyuhe fatizo bw’umubiri w’umugore, uburyo bwo kugenzura imimerere y’inkondo y’umura, uburyo bwo gupima ubushyuhe fatizo bw’umubiri no kugenzura n’ibindi bimenyetso, mu minsi ibiri.

Uburyo buvanga ibimenyetso : Uburyo bukoreshwa n’abujuje ibyangombwa ni  uburyo bushingiye ku kugenzura ibimenyetso by’uburumbuke n’ibitari uburumbuke biboneka mu kwezi ku mugore.

2. Uburyo bukoreshwa n’abujuje ibyangombwa busaba : Uburyo bwo kubara, uburyo  bwo konsa, uburyo bw’iminsi idahinduka cyangwa uburyo bw’urunigi.

Ibyiza byo guteganya imbyaro hakoresheje uburyo bwa kamere harimo kuba nta ngaruka mbi ubu buryo butera kubabukoresha  nta n’ikiguzi kandi urugo rumaze kumenya gukoresha ubu buryo usanga bazi neza kwirinda gusama batabiteguye, igihe bahuye n’ikibazo kibagoye bakajya kureba umufasha w’ingo. Ubu buryo kandi bwongera urukundo mubashakanye, ubwumvikane buriyongera, iterambere no kwizerana.

Ni muri urwo rwego Kiliziya Gatolika nk’umufatanyabikorwa uhoraho wa reta y’ u Rwanda mu nzego zitandukanye  mu majyambere , ubutabera n’amahoro, imibereho myiza y’abaturage , n’ubuzima   nayo itarebereye icyo kibazo cy’ubwiyongere bw’abaturage butajyanye n’ubushobozi bw’imiryango, Caritas ya Arikidiyosezi ya Kigali ibifashijwemo  na Caritas Rwanda  nabo babitewemo inkunga n’umuryango John Templeton Foundation  yo muri kaminuza y’ubushakashatsi mu bijyanye n’ubuzima bw’imyororokere , ya Georgetown yabashije gufasha imiryango muri gahunda yo guteganya imbyaro hifashishijwe uburyo bwa kamere .

Uku gushyira hamwe kw’inzego zitandukanye bizafasha u Rwanda kurwanya ubwiyongere bw’abaturage butajyanye n’ubukungu bw’igihugu bityo bitume abanyarwanda babasha kubaho neza mu mibereho yabo.

Bizakemura kandi ikibazo cyatangiye kugaragara mu mu ryango  nyarwanda cy’ubwiyongere bw’abaturage kuko imiryango myinshi ifite umubare ugizwe n’umubare udahwanye n’ubushobozi bwabo.

Uretse ubu buryo bwo guteganya imbyaro hakoreshejwe uburyo bwa kamere bwashyizemo imbaraga na Caritas ya Kigali, na Guverinoma y’u Rwanda binyuze muri minisiteri y’ubuzima yakoresheje imbaraga nyinshi  igeza ku baturage uburyo bwo guteganya imbyaro butandukanye, kwirinda inda zitateganijwe mu rubyiruko kugirango umuryango nyarwanda urusheho kugira imibereho myiza.

Done By Editor