CARITAS KIGALI

UBUTUMWA NYIRUBUTUNGANE PAPA FRANSISKO YAGENEYE ABAKRISTU KU MUNSI MPUZAMAHANGA WA MBERE W’ABAKENE ICYUMWERU CYA 33 GISANZWE (KU WA 19 UGUSHYINGO 2017)

Arikidiyosezi Gatolika ya Kigali
Icyicaro Gikuru cya Kiliziya Gatolika ku isi cyashyizeho umunsi w'abakene

Urukundo rwacu niruve mu magambo rujye mu bikorwa

  1. “Twana twanjye, ntitugakundane mu magambo no ku rurimi, ahubwo mu bikorwa no mu kuri” (1 Yh 3, 18). Aya magambo ya Yohani Intumwa, aragaragaza ikintu cya ngombwa buri mukristu adakwiye kwirengagiza. Ubu buremere iyi « ntumwa Yezu yakundaga cyane» itangazanya kugeza muri ibi bihe byacu iri tegeko ry’urukundo, burushaho kandi gushimangirwa n’ivuguruzanya riri hagati y’amagambo masa dukunze kuvuga n’ibikorwa bigaragaza urukundo rwacu. Urukundo ntirugira urwitwazo: Umuntu wese wumva ashaka gukunda nka Yezu, agomba kumwigana; cyane cyane iyo ahamagarirwa gukunda abakene. Uburyo Umwana w’Imana akundamo kandi burazwi, ndetse na Yohani arabusobanura neza. Bushingiye ku nkingi ebyiri : Imana yadukunze mbere (1 Yh 4,10.19), kandi idukunda yitanga itizigamye, kugeza aho guhara amagara (1 Yh 3,16).

 

Urukundo nk’urwo ntirwabura ingurane. Nubwo twaruhawe tutabanje kubazwa ko turukeneye kandi nta kiguzi dusabwe, ikibatsi cyarwo kigurumana mu mitima yacu ku buryo uwarumenye wese na we agomba gukunda. Cyakora tugira aho tugarukira kuko turi abanyabyaha. Ni yo mpamvu, ibyo bidushobokera iyo twakiriye mu mitima yacu ingabire y’Imana n’urukundo rwayo rwuje impuhwe, uko tubishoboye kose, kugira ngo bitugurumanishemo ubushake n’ibyiyumvo byo gukunda Imana ubwayo ndetse na bagenzi bacu. Iyo bigenze bityo, impuhwe zitunguka-tubivuge dutyo- mu mutima w’Ubutatu, zituma tugira imbaraga zidutera kumva akababaro k’abavandimwe bacu no kubagirira impuhwe, tukabafasha mu byo bakeneye. 2 Byashyizwe mu Kinyarwanda n’ibiro by’Inama y’Abepisikopi Gatorika mu Rwanda bishinzwe ihinduranyandiko

 

  1. “Umukene yaratabaje, Uhoraho aramwumva” (Zab 34,6). Kiliziya ntiyahwemye kumva no guha agaciro uku gutabaza. Dufite ubuhamya buhagije mu mapaji ya mbere y’igitabo cy’Ibyakozwe n’Intumwa, aho Petero asaba ko bahitamo abagabo barindwi, “buzuye Roho Mutagatifu n’ubuhanga” (6,3) kugira ngo bashingwe umurimo wo kwita ku bakene. Nta gushidikanya rero ko gufasha abakennye cyane ari umwe mu migenzo ya mbere yaranze umuryango w’abakristu ku isi. Ibyo babikesheje kuba bari barumvise neza ko ubuzima bw’abigishwa ba Yezu bwagombaga kugaragarira mu buvandimwe no mu bufatanye, ku buryo bujyanye n’inyigisho z’Umwigisha Mukuru, wari waravuze ko abakene bahirwa kandi ko umurage wabo ari ingoma y’ijuru (Mt 5, 3).

“Bagurishaga amasambu yabo n’ibintu byabo, bose bakagabana ikiguzi cyabyo bakurikije ibyo buri muntu akeneye”(Intu 2,45). Muri aya magambo, turabona neza ibyari bishishikaje abakristu ba mbere. Luka, umwanditsi w’Ivanjili, wavuze cyane ku mpuhwe z’Imana kurusha abandi bose, ntabwo akabya iyo ashushanya igikorwa cyo gusangira cyarangaga imiryango ya mbere y’abakristu. Ahubwo, mu kucyamamaza, arashaka kukibwira abemera bo mu bihe byose, ndetse natwe turimo, kugira ngo adufashe guhamya ibyo natwe tubona, kandi adushishikarize kwita kuri ba bandi bakeneye cyane gufashwa.

Ubu butumwa kandi bwongeye gushimangirwa cyane na Yakobo Intumwa, aho mu ibaruwa ye, akoresha amagambo akakaye, agira ati : “Nimwumve, bavandimwe nkunda! Mbese nyine Imana si yo yahisemo abakene muri iyi si, kugira ngo babe abakungahazwe mu kwemera, n’abagenerwamurage b’Ingoma Imana yasezeranyije abayikunda? Nyamara mwebwe mwima umukene icyubahiro cye. Mbese ye, abakire si bo babakandamiza? Si bo se babajyana mu nkiko?...Byaba byunguye iki se, bavandimwe banjye, umuntu avuze ko afite ukwemera niba adafite ibikorwa? Uko kwemera se gushobora kumukiza? Niba umuvandimwe wawe cyangwa mushiki wawe bambaye ubusa, cyangwa se badafite ibyo kurya bya buri munsi, maze muri mwe hakagira ubabwira ati ‘nimugende amahoro, mwote kandi muryoherwe’ atabahaye ibibatunga, byaba bimaze iki? Bityo rero, n’ukwemera kutagira ibikorwa kuba kwarapfuye ubwako” (Yak 2, 5-6.14-17).

  1. Cyakora, habayeho ibihe abakristu batumvaga neza uyu muhamagaro uko wakabaye; bari bariganye imitekerereze y’ab’isi. Nyamara Roho Mutagatifu yashoboye kubashishikariza kumenya guhitamo iby’ingirakamaro. Ni muri ubwo buryo, yahagurukije abagore n’abagabo, bitangira gufasha abakene mu buryo butandukanye. Mbega ngo muri iyi myaka ibihumbi bibiri ishize, amapaji atabarika y’amateka arandikwa n’abakristu bashoboye gufasha abavandimwe babo

 

bakennye cyane kurusha abandi, kandi bakabikora mu bwiyoroshye no kwicisha bugufi, babitewe n’uko biyumvishaga muri bo ubugwaneza bw’urukundo!

Urugero rwa hafi ni urwa Mutagatifu Fransisko wa Asizi, wakurikiwe n’abandi batagatifu benshi uko imyaka yagiye isimburana. Fransisko wa Asizi ntiyanyuzwe no guhobera abanyabibembe no kubasigira agafashanyo ku nzira aho babaga basabiriza, ahubwo yahisemo kujya kubana na bo i Gubbio. Kuri we ubwe, uku guhura na bo byamubereye inzira yo guhinduka: “Igihe nari mu byaha, kubona abanyabibembe byaranshaririraga bitavugwa. Nuko Nyagasani ubwe anjyana rwagati muri bo, maze numva mbagiriye impuhwe. Kandi igihe mbavuyemo, icyasaga n’icyanshaririraga cyane, cyahindutsemo ubwiyoroshye bwa roho n’ubw’umubiri”. ” (Ubuhamya 1-3: FF 110). Ubu buhamya buragaraza uburyo urukundo rufite imbaraga mu guhindura ibintu ndetse n’ibiranga ubuzima bwa gikristu.

Ntitugatekereze ku bakene gusa nk’abantu dushobora kugira icyo dufasha ku bushake, rimwe mu cyumweru, cyangwa abantu twakorera ibikorwa bitunguranye by’ubugwaneza bituma umutimanama wacu utuza. Yego ibyo bikorwa ni byiza kandi ni ingirakamaro mu kumvikanisha neza ibyo abo bavandimwe benshi bakeneye ndetse n’akarengane gatuma babaho muri ubwo buzima bubi; ariko nibidutere guhura kenshi n’abakene maze gusangira na bo bibe nk’umuco. Mu by’ukuri, urukundo rwemera gusangira n’abandi ni rwo rugaragaza ko isengesho, urugendo no guhinduka by’umwigishwa wa Yezu Kristu bishingiye ku ivanjili. Ubu buryo bw’imibereho butuma roho igira ibyishimo n’amahoro kuko dufata n’ibiganza byacu umubiri wa Kristu. Niba dushaka guhura na Kristu koko, tugomba gukora ku mubiri we, binyuze mu mibiri y’abakene yuzuye ibisebe, tubikesheje isakaramentu ry’ugusangira duhabwa mu Ukaristiya. Muri liturujiya ntagatifu, Umubiri wa Kristu, wamanyuwe, wigaragaza binyuze mu rukundo dusangiza abavandimwe bacu baciye bugufi kandi baduhanze amaso. Impanuro za Mutagatifu Krizostome, Umwepiskopi, zikomeza kuba iz’iki gihe: “Niba mushaka kubaha umubiri wa Kristu, mwiwusuzugura igihe wambaye ubusa; nimusigeho kubaha Kristu wo mu Ukaristiya ukikijwe n’imitako y’umuhemba, maze ngo nimusohoka mu kiliziya musuzugure uwo Kristu wundi wishwe n’imbeho kandi wambaye ubusa”.(Matthaeum, 50.3: PG 58)

Duhamagariwe rero kwakira abakene, guhura na bo, kurebana na bo mu maso no kubahobera kugira ngo tubumvishe ubushye bw’urukundo, bityo bibafashe kuva mu bwigunge.

Biriya biganza badutegera na byo bitumenyesha ko tugomba gusohoka mu byatwigaruriye no mu mitamenwa yacu, tukiyumvisha neza ubukene ubwabwo icyo ari cyo.

  1. Ntitwibagirwe ko, ku bigishwa ba Kristu, ubukene ari umuhamagaro wo gukurikira Yezu w’umukene, mbere ya byose. Ni ukumugenda inyuma kandi ukagendana na we, mu rugendo rugana mu ihirwe ry’ingoma y’ijuru (Mt 5,3; Lk 6,20). Gukena ni ukugira umutima uca bugufi, wemera ko ubushobozi bwa muntu bugira aho bugarukira kandi ko ari umunyabyaha. Ibyo bimufasha gutsinda igishuko cy’uko ashobora byose, cya kindi gituma yibwira ko adashobora gupfa. Ubukene ni imyumvire yo ku mutima iturinda kwiyumvisha ko tubereyeho gushakira umunezero ku mafaranga, mu mirimo no ku bindi bishimisha. Ubukene ni bwa bundi butuma dusohoza, ku bushake, inshingano zacu bwite n’iza sosiyete. Nubwo buri wese agira aho atarenga, twemera ko turi kumwe n’Imana kandi dushyigikiwe n’ubuntu bwayo.

 

Kumva ubukene muri ubu buryo, bitubera igipimo kidufasha gusuzuma uburyo bwiza bwo gukoresha ibyo dutunze no kumenya kubana neza n’abandi twirinda ubwikubire no kuba ba nyamwigendaho. (Gatigisimu ya kiliziya gatolika, nimero 25-45).

Bityo rero, niturebere ku rugero rwa Mutagatifu Fransisko, umuhamya w’ubukene nyabwo. Kubera gukomeza guhanga amaso Kristu, Fransisko yashoboye kumumenya no kumukorera binyuze mu bakene. Niba rero dushaka kugira uruhare rugaragara mu guhindura amateka duharanira iterambere nyaryo, dukwiye kumva ugutabaza kw’abakene no kwiyemeza kubavana mu kato barimo. Ku rundi ruhande ariko, ndasaba abakene baba mu mijyi yacu no mu miryango yacu kwirinda gutesha ubukene bafite ishusho yabwo igaragara mu ivanjili.

  1. Tuzi uburyo bigoye abantu bo muri iki gihe kwiyumvisha neza icyo ubukene ari cyo.

Nyamara, ubu bukene buduteye ikibazo, mu gihe tubona hari abababara batabarika, abashyirwa mu kato, abakandamizwa, abahura n’inabi, abicwa urubozo n’abafungwa, abahura n’intambara, abamburwa ubwigenge n’icyubahiro, abazira ubujiji n’ukutamenya, ababura ubuvuzi bwihutirwa n’akazi, abahura n’icuruzwa ry’abantu n’ubucakara, abahunga, abakene ku buryo bukabije n’abimuka batabishaka. Ubukene bugaragarira muri ba bagore, ba bagabo na ba bana bakoreshwa ibyo badashaka mu nyungu z’abandi maze uburenganzira bwabo bugahonyorwa hakoreshejwe agatuza n’amafaranga. Mbega ngo urutonde ruteye agahinda ruraba rurerure, turamutse twongereyeho ubukene buturuka ku karengane, guta ubunyamuntu, umururumba wa ba nyamuke, no kuba ntibindeba bimaze gukwira hose!

 

Ikibabaje ni uko, muri iyi minsi, mu gihe hagenda hagaragara ubukungu butita ku bakene kandi bwikubiwe na ba nyamuke bahiriwe, akenshi kandi bukajyana no kurenganya no gukoresha abantu ibibatesha agaciro, ikwirakwira ry’ubukene ryibasiye igice kinini cy’isi ku buryo buteye ubwoba. Imbere y’ibintu nk’ibi, ntitwakomeza kurebera, cyangwa ngo twemere ko biguma bityo. Kuri ubu bukene buzitira urubyiruko rushaka guhanga udushya, bukarubuza kubona akazi; kuri ubu bukene butuma tutumva inshingano dufite ahubwo tukazitwerera abandi kandi bukimakaza itonesha; kuri ubu bukene bukumira uruhare rw’abandi ntibutume habaho gukora kinyamwuga kuko budaha agaciro gakwiye abafite ubushobozi kandi batanga umusaruro; kuri ibyo byose, tugomba gushaka ibisubizo dukoresheje guhindura imyumvire yacu ku buzima na sosiyete.

Abakene bose -nk’uko Papa Pahulo wa 6 yakundaga kubivuga- ni aba Kiliziya, ukurikije ibivugwa mu ivanjili (Reba Ijambo rifungura inteko ya kabiri ya Konsili ya Vatikani ya Kabiri, 29 nzeri 1963), kandi badukeneyeho umusingi w’ubuzima bwabo. Bityo rero, harahirwa ibiganza byiteguye kwakira abakene no kubafasha kuko ari ibiganza bituma bagira icyizere. Harahirwa ibiganza birenga ivangura iryo ari ryo ryose, ryaba irishingiye ku muco, ku iyobokamana no ku bwenegihugu, maze bikomoza amavuta ibisebe by’abababara. Birahirwa ibiganza birambuye nta ngurane n’imwe bisabye, nta “iyo” cyangwa “ariko” cyangwa “ birashoboka” kuko ari ibiganza bisabira abavandimwe umugisha ku Mana.

6.Dusoza yubile y’impuhwe z’Imana, natekereje gushyiraho muri Kiliziya umunsi mpuzamahanga w’abakene, kugira ngo ku isi hose, imiryango y’abakristu ishobore kuba ikimenyetso kigaragara cy’urukundo rwa Kristu ku basigaye inyuma y’abandi n’abakennye cyane. Ku yindi minsi mikuru mpuzamahanga yashyizweho n’abambanjirije, imaze no kumenyerwa mu buzima bw’imiryango yacu, ndashaka kongeraho uyu nguyu w’abakene, kuko utuma irushaho kugira isura nyayo y’ivanjili, udufasha gushyira mu bikorwa ibyo Yezu adusaba gukorera abakene.

Kuri uyu munsi, ndashishikariza Kiliziya ku isi hose ndetse n’abandi bantu bafite umutima mwiza , kutirengagiza bariya bantu batega ibiganza hirya no hino, basaba gutabarwa kandi bashaka ko twifatanya na bo. Ni abavandimwe bacu, baremwe kandi bakundwa n’Imana Data uri mu ijuru. Mbere ya byose, uyu munsi ugamije guhwiturira abemera kurwanya ingeso mbi yo gupfusha ubusa no kwigizayo abandi, ahubwo bagahitamo umuco wo guhura na bo. Byongeye kandi, ndashingiye ku idini cyangwa itorero, mpamagariye buri wese kwemera gusangira n’abakene mu buryo bwose bw’ubufatanye, bugaragaza ubuvandimwe nyabwo.

Imana yaturemeye twese ijuru n’isi ariko ikibabaje ni uko twahindukiye tugashyiraho imipaka, tukubaka inkuta n’inzitiro, bityo tugakoresha nabi iyo mpano y’umwimerere yagenewe kiremwa muntu twese nta n’umwe uvuyemo.

7.Mu cyumweru kibanziriza uyu munsi mpuzamahanga w’abakene, uzaba ku itariki ya 19 ugushyingo 2017, ku cyumweru cya 33 gisanzwe, ndifuza ko imiryango y’abakristu yazakora ibishoboka byose igashyiraho umwanya wo guhura no gutsura umubano, kwifatanya no gukusanya inkunga igaragara. Nyuma y’ibyo, bashobora gutumira abakene n’abakorerabushake mu gitambo cy’Ukaristiya cyo kuri iki cyumweru, ku buryo ihimbazwa ry’umunsi mukuru wa Nyagasani Yezu Kristu, Umwami w’isi, ku cyumweru gikurikiyeho, ryaba koko rifite umwihariko waryo. Mu by’ukuri, ubwami bwa Kristu bugaragarira cyane i Golgota, igihe Inzirakarengane, uwabambwe ku musaraba, umukene, uwambaye ubusa kandi wacujwe byose, yuzuye kandi agahishura ubusendere bw’urukundo rw’Imana. Ukwishyira mu biganza bya Se, byumvikanisha ko we nta na gito yishoboreye, bikagaragaza imbaraga z’urwo rukundo zamuzuriye kuba mu buzima bushya ku munsi wa Pasika.

Kuri icyo cyumweru, niba aho dutuye hari abakene bakeneye gutabarwa no gufashwa, nitubegere. Bizatubera umwanya mwiza wo guhura n’Imana dushakashaka. Dukurikije ibyanditswe (reba Intg 18,3-5; Heb 13,2), nitubahe ikaze ku meza yacu nk’abashyitsi b’icyubahiro. Bashobora kutubera abarimu badufasha kubaho mu kwemera ku buryo bwuzuye. Nibatugirira icyizere kandi bakemera kwakira inkunga yacu, bizatwereka mu buryo butuje kandi bunejeje akamaro ko gukora igikenewe no kwirekurira ubuntu bwa Data.

  1. Ibikorwa byose byo kuri uyu munsi bigomba gushingira ku isengesho. Ntitwibagirwe ko Dawe uri mu ijuru ari isengesho ry’abakene. Mu by’ukuri, ugusaba umugati kugaragaza ko twizera ko Imana ari yo iduha kubona iby’ibanze dukeneye mu buzima bwacu. Icyo Yezu yatwigishije muri iri sengesho, ni ukumvikanisha no kwakira ugutabaza k’umuntu ubabara bitewe n’ubuzima budafashe no kubura ibyo akeneye. Igihe abigishwa ba Yezu bamusabaga kubigisha gusenga, yabasubije akoresheje amagambo y’abakene babwira Umubyeyi bose bahuriyeho nk’abavandimwe. Dawe uri mu ijuru ni isengesho rivugwa mu bwinshi: umugati dusaba ni uwacu, kandi ibi bisobanuye ugusangira, uguhuriza hamwe no kugira inshingano rusange. Muri iri sengesho, twese twemera ko dukeneye kurenga icyitwa ubwikubire cyose kugira ngo twinjire mu byishimo byo kwakirana bamwe ku bandi.

9.Ndasaba Abepiskopi bagenzi banjye, abapadiri n’abadiyakoni - ku bw’umuhamagaro, bafite ubutumwa bwo gufasha abakene-, abihayimana, amashyirahamwe, imiryango n’imbaga y’abakorerabushake, kumfasha kugira ngo uyu munsi mpuzamahanga w’abakene umenyerwe kandi ugire uruhare rugaragara mu iyogezabutumwa ku isi yo muri iki gihe.

Byongeye kandi, uyu munsi mpuzamahanga mushya nukangure umutimanama wacu nk’abemera, kugira ngo turusheho kwiyumvisha neza ko gusangira n’abakene biduha kumva neza ivanjili mu kuri kwayo kose. Abakene ntibaduteye ikibazo kuko batubereye isoko tuvomamo imbaraga zituma tubaho mu buzima bumurikiwe n’Ivanjili.

 

Bikorewe i Vatikani , ku wa 13 Kamena 2017

Ku munsi mukuru wa Mutagatifu Antoni wa Paduwa

 

Papa Fransisko

 

Copyright - Libreria Editrice Vaticana

Byashyizwe mu Kinyarwanda n’ibiro by’Inama y’Abepisikopi Gatorika mu Rwanda bishinzwe ihinduranyandiko

 

 

 


Byanditswe : tariki ya 21 Ugushyingo 2018 saa 13:12:45, ubu
Uwabitangaje : Umwanditsi Mukuru

֩ Ibitekerezo kuri iyi nkuru (0)

Nta gitekerezo kiratangwa kuri iyi nkuru, tanga agatego ube uwa mbere kugira icyo ubivugaho

Umugenzuzi

Funga Amazina:

Ijambo ry'ibanga:

Ohereza igitekerezo

Funga       
     

-
-


B I U URL    :) :( :P :D :S :O :=) :|H :X :-*

Ohereza ifoto (itarengeje 200 kb), ariko si ngombwa

Andika iri jambo ry'igenzura:   4e8c3