CARITAS KIGALI

CARITAS YA KIGALI YAMURITSE IBYO YAKOZE KUGIRA NGO IFASHE ABANA BO MU MUHANDA

Arikidiyosezi Gatolika ya Kigali
Mubyo yagezeho harimo no kwigisha abana imyuga

Mu kigo cya Pastorale St Paul, Tariki ya 18 Ugushyingo umushinga w’Abadacogora n’Intwari wa Caritas y’Arkidiyosezi ya Kigali wamuritse ubushakashatsi ku bana babaga mu muhanda bakanyura mu bigo by’uwo mushinga, n’ubushakashatsi ku bana bari mu muhanda ubu, ndetse baboneraho no kwakira abandi bashyashya baba mu muhanda mu kigo cy’Abadacogora n’Intwari.

Padiri Twizeyumukiza Donatien, umuyobozi wa Caritas ya Kigali , yagaragaje uko icyo kigo cyatangiye n’intego cyari gifite mu gukemura ikibazo cy’abana bo mu muhanda.

Yagize ati Ibikorwa byatangiye mu mwaka 1984, ubu icyo kigo kimaze imyaka 32, kiri hafi ya Paruwasi y’Umuryango Mutagatifu (Sainte Famille). Mu 1985, havuka ikindi kigo cya Nyamirambo, nyuma 1987 haza ikigo Intwari nacyo kuri Sainte Famille, cyakiraga abana b’abakobwa babaga mu muhanda”. Icyari kigamijwe byari uguha abana uburere bagaherekezwa bagasubira mu ishuri ndetse bagasubira mu miryango kugira ngo imibereho yabo, mu mibanire ndetse no mu bukungu ikomeze gutera imbere.”

Yakomeje asobanura uburyo bageraga kuri abo bana kugira ngo babashishikarize kuva mu muhanda kandi batabahutaje. Agira, ati “Kugira ngo abo bana babashe kuva mu muhanda , hakorwa igikorwa cyo kubegera tukaganira nabo, tukabarangira aho dukorera kugira ngo nibagira ubushake bwo kuva mu muhanda bazizane. Ababyemeye nibo turi kumwe uyu munsi nibo twabanye muri iriya myaka”

Avuga ko byabaga ari inzira ndende kuko abo bana babaga bafite uburere butandukanye n’ibibazo bitandukanye. Ati “Iyo bahageze, baza batandukanye mu burere. Hari ababa bavuye mu mashuri bayacikirije, abatarigezemo, abatazi gusoma no kwandika, ndetse n’abadashaka kwiga, baba bafite ibyiciro bitandukanye. Habanza kuganirizwa abajya mu ishuri bakajyayo, nyuma hakaza kwegera umuryango w’umwana nawo ukaganirizwa ubundi umwana agasubizwa mu muryango”.

Avuga ko abo bana iyo basubijwe mu ishuri bahabwa ibikoresho by’ishuri ndetse bakanabagaburira saa sita, bagakurikiranwa mu miryango, ndetse bakanasurwa ku mashuri kugira ngo bakomeze gukurikirana uburere bwabo. Muri bo hari n’ababyeyi bafashwa mu mishinga mito kugira ngo babashe kurera abo bana.

Ibyagezweho mu myaka 32

Ikigo Abadacogora n’Intwari kuva cyatangira kimaze kwakira abana bavuye mu muhanda barenga 363461, ariko abishyuriwe amashuri basaga 2947 kuva mu 1984 kugeza mu 2014. Ubu bushakashatsi bwakorewe ku bagera ku 280, bahanyuze bari muri Kigali bagamije kumenya uburyo babayeho nyuma yo kuva muri ubwo buzima n’uburere baba barakuye muri iki kigo.

Ubu bushakashatsi bugaragaza ko hagati y’umwaka wa 2005-2015 aribwo bakiriye abana benshi bagera 1683 kandi abo bana bigaragara ko bari bafite ababyeyi, bitandukanye n’abana bakiriye nyuma ya Jenoside yakorewe abatutsi kuva 1995 kugeza 2004, barakiriye abana 678.

Muri abo bakoreweho ubushakashatsi, mu bibazo binyuranye bigendanye n’ubuzima n’imibereho babayeho basanze 12% n’abakobwa babyariye iwabo, 37% baracyari ingaragu naho 55% bubatse ingo, ibi bikagaragaza umusaruro mwiza kuko byibura umubare mu nini wabashije kubaka ingo.

Mu babajijwe, 24.6% babashije kwiga kuva ku mashuri atanu yonyine y’uburezi bw’ibanze, 25% bize imyuga, naho 7% barangije amashuri yisumbuye, abageze muri Kaminuza byibuze imyaka itatu n’ine ni 2.8%.

Mu birebana n’imibereho yabo, abakora akazi k’ibiraka ni 42,5%, abatagira akazi ni 6%, abakozi ba leta ni 13,5% abandi bakaba bari mu mirimo inyuranye ibafasha gutunga imiryango yabo. Ababajijwe kandi bagaragaza ko uburere n’ubumenyi bakuye mu Badacogora n’Intwari byabafashije kwibeshaho, nk’uko bigararazwa n’ubuhamya bwa bamwe mu babajijwe.

Abarerewe muri icyo kigo kandi bashimira cyane uburere bahakuye, imbaraga abarezi babo bakoreshaga kugira ngo basubire mu murongo, bakavuga ko byabafashije guhindura imico mibi babaga bafite. Gusa bamwe bakavuga ko nyuma yo kuva muri icyo kigo batabonye ubundi bufasha nk’igishoro ngo bakomeze ubuzima bw’ibyo babaga bakuye mu mashuri.

Abahanyuze kandi basanga n’ubwo bafashwa kwiga amashuri abanza, imyuga n’ayisumbuye bidahagije basaba ko bajya banaherekezwa kwiga kaminuza kubabifitiye ubushobozi. Banagaragaza ikibazo cy’aho abakobwa bakirirwa aricyo kigo Intwari ko nabo batagira aho barara.

Bimwe mu byifuzo byabo

Abakoreweho ubushakashatsi barifuza ko ababyeyi bajya bamenya inshingano zabo ku bana, bakamenya kubaha uburere bukwiye, kandi ntibikorwe n’umubyeyi umwe, bigakorwa n’umugabo n’umugore, kandi bakagira umwanya uhagije wo kuganira n’abana babo.

Bakifuza ko banafasha imiryango ifite ibibazo gukemura amakimbirane abana batarajya mu muhanda. Bagasaba indi miryango kugira ibikorwa byo gufasha abana bari mu muhanda kuva mu bibazo.

Banasabye Ikigo Abadacogora n’Intwari kongera aho bakirira abana b’abakobwa, no kujya bakurikirana abana bavuye muri icyo kigo bakanabasura cyane mu miryango.

Uko ikibazo cy’abana bo mu muhanda gihagaze

Ikibazo cy’abana bo mu muhanda kiracyaboneka hirya no hino. Niyo mpamvu   abakozi bo mu Badacogora n’Intwari bafashe umwanya wo kureba uko abana bo mu muhanda bangana, n’igikorwa cyakozwe mu kwezi kwa Kanama 2016, iki gikorwa cyakorwaga umunsi n’ijoro bagamije kubarura abana barara mu muhanda bo mu mujyi wa Kigali no kumenya impamvu ibavana mu miryango bakajya mu muhanda.

Ubusanzwe n’igikorwa gikorwa nyuma y’imyaka itatu. Iryo barura ryakozwe mu maparuwasi 28 agize Arikidiyosezi ya Kigali, icyari kigamijwe n’ukumenya umubare w’abana bari mu muhanda.

Ikibazo cy’abana bo mu muhanda n’ubwo cyafatiwe ingamba ariko biragaragara ko bakijya mu muhanda, ngo impamvu zibitera cyane ni ihohoterwa riba mu ngo, imico mibi y’ababyeyi harimo gusinda no kurwana kw’abashakanye abana bakananirwa kubyihanganira, hari ubukene, amakimbirane ndetse no kutita ku nshingano z’ababyeyi.

Iryo barura ryasanze abarenga 837 ari abana barara mu muhanda harimo 129 b’abakobwa na 708 b’abahungu. Muri abo bana abagera 465 baboneka mu gice cy’icyaro cy’iyo arikidiyosezi ya Kigali naho 372 baba mu mujyi wa Kigali.

Mu turere dutatu tugize umujyi wa Kigali aritwo Nyarugenge, Gasabo na Kicukiro hagaragaramo aho barara ariho bita ingangi 104, zibamo abana bagera kuri 590

Iyi mibare igaragaza ko abana bagabutse mu bice by’icyaro ugereranyije n’ababonetse muri 2013, babifashijwemo n’ubuyobozi bw’inzego z’ibanze ndetse n’abakorerabushake ba Caritas mu maparuwasi. Kuko hari aho babaga hatakigaragara abana nko muri Paruwasi ya Karenge na Munyana hatabonetsemo umwana n’umwe.

Uyu munsi kandi waranzwe no kwakira abana batarererwa mu kigo

Kiliziya Gatolika yatangije umwaka w’impuhwe z’Imana 13 Ukuboza 2015, mu rwego rwo kuwusoza, Ikigo abadacogora n’intwari bifuje gusangira n’abana bose babishatse bari mu muhanda. Habaye igitambo cya misa ndetse basangira n’ifunguro babaha imyambaro mu rwego rwo kubereka urukundo n’impuhwe. Babonera kwerekwa imikino inyuranye igararaza ububi bwo mu muhanda.


Byanditswe : tariki ya 24 Mata 2017 saa 08:25:49, ubu
Uwabitangaje : Administrator Caritas-CDJP

֩ Ibitekerezo kuri iyi nkuru (0)

Nta gitekerezo kiratangwa kuri iyi nkuru, tanga agatego ube uwa mbere kugira icyo ubivugaho

Umugenzuzi

Funga Amazina:

Ijambo ry'ibanga:

Ohereza igitekerezo

Funga       
     

-
-


B I U URL    :) :( :P :D :S :O :=) :|H :X :-*

Ohereza ifoto (itarengeje 200 kb), ariko si ngombwa

Andika iri jambo ry'igenzura:   5640a