CARITAS KIGALI

Umuryango utekanye niwo nshingiro ry’uburere bwiza

Arikidiyosezi Gatolika ya Kigali
Mu muryango niho habonekera uburere bw'umwana

Umuryango utekanye niwo nshingiro ry’uburere bwiza

Mu ihuriro ry’imiryango ifite abana bavuye mu buzima bwo mu muhanda ryateguwe na Arkidiyosezi ya Kigali tariki ya 14/2/2020 inzego za reta ndetse n’ababyeyi hamwe n’abihayimana basanze umuryango mwiza ariwo shingiro ry’uburere bwiza.

Iri hurirro ryabereye muri St Paul aho bunguranye ibitekerezo barebera hamwe icyatuma umuryango nyarwanda utekana.

Igisonga cy’umwepisikopi wa Kigali Uwumukiza casimir yasobanuye ko umuryango waremwe n’Imana aho yahereye ku iremwa ry’Adamu na Eva agaragaza ko Imana yishimiye ko umuntu ataba wenyine ifata ikemezo cyo kurema umuryango.

Mu byiza by’umuryango yavuze n’uko abantu bafatanya bagashyira hamwe, ndetse ababakomokaho bakaba imbuto z’umugisha uva ku Mana bityo bakitabwaho n’ababyeyi babo.

Igisonga cy’umwepisikopi wa Kigali Uwumukiza casimir yagize ati“ Imana igizwe n’ubutatu butagatifu, Imana Data, Imana mwana, Imana Roho mutagatifu, ni umuryango nawo urimo ubutatu bw’umugabo, umugore ndetse n’umwana”

Niyo mpamvu Arkidiyosezi ya Kigali yateganyije icyumweru cy’umuryango kuva tariki ya 12 kugera tariki ya 16 Gashyantare mu mwaka wa 2020 muri iki cyumweru hakaba harateganyijwe ibikorwa bitandukanye byo guteza imbere umubano mwiza mu miryango.

Padiri Twizeyumuremyi Donatien umuyobozi wa Caritas Kigali yasobanuriye abitabiriye iri huriro intego yabo yo kwita ku muryango n’abawugize ibinyinyujije mu kigo cy’Abadacogora-Intwari cya Caritas ya Kigali.

Intego ya mbere ni ugukura abana mu mihanda bakabagorora bakanabigisha , bakongera bakabasubiza mu miryango yabo kuko ariho bakura uburere bwiza n’urukundo nyakuri.

Ikigo cy’Abadacogora-Intwari cya Caritas Kigali kita ku bana bo mu muhanda kuva mu mwaka wa 1984 kugeza mu mwaka wa 2019 kimaze kwakira abana bo mu muhanda ibihumbi 6217.

Aba bana iyo babakuye mu muhanda babajyana mu ishuri hakurikijwe ibyiciro barimo.

Imibare y’abana bafashijwe kurangiza amashuri mu mashuri abanza harimo abana ibihumbi 4817 muri bo harimo abahungu ibihumbi 2826 n’abakobwa 1991. Abana bahabwa ibyangombwa byose bibafasha kwiga neza.

Mu mashuri yisumbuye ni 502 harimo abahungu 339, n’abakobwa 163. Mu mashuri y’imyuga ni 898 harimo abahungu 581, n’abakobwa 317.

Abanyeshuri bafashwa kubona ibyangombwa byose, harimo amafaranga y’ishuri, imyambaro n’ibikoresho by’ishyuri, bagakurikirwa mu myigire yabo.

Iyo barangije bafashwa mu kubona ibikoresho by’ibanze bizatuma bashobora kwihangira imirimo.

Kujyana abana bo mu muhanda ku ishuri ni imwe mu nzira yo kubakuru mu buzererezi no kubafasha kuzavamo abagabo bahamye kuko byagaragaye ko baba bafite impano zitandukanye kandi ari abahanga.

Padiri avuga ko urugendo rwo kwita kuri abo bana ari urugendo rurereru kuko bitarangirira gufasha abana gusa gusubira mu buzima bwo mu miryango yabo ahubwo banafasha imiryango bakomokamo kwiteza imbere aho bayibumbira mu matsinda, bakabaha n’inkunga y’amafaranga yo gukora imishinga iciriritse ibyara inyungu.

Ibikorwa bakorera umuryango ni byinshi kuko banabakorera ubujyanama ndetse bakabakurikirana umunsi ku wundi kugirango barebe ishyirwa mu bikorwa ry’imishinga yabo ndetse n’impinduka byabazaniye mu mibereho yabo.

Padiri Twizeyumuremyi Donatien uyobora Caritas Kigali avuga ko  ababyeyi bahabwa inguzanyo mu gihe cy’amezi 6 binyuze mu matsinda, bishyura buri cyumweru kereka itsinda rikora ubuhinzi niryo ryishyura rimwe mu kwezi.

Iyo bamaze kwishyura babaha andi mafaranga bagakomeza bakishyura. ubu hamaze gufashwa ababyeyi bagera muri 361 harimo abagabo 42 guhera 2017.  ariko bagenda bahabwa andi ubu itsinda riri ku isonga rimaze guhabwa inshuro zigera muri 6, irikurikiyeho 5, andi ni inshuro 3. Mu mwaka wa 2017 hatanzwe inguzanyo ingana na 17.245.500frw, mu mwaka wa 2018 hatanzwe inguzanyo ingana na 22.771.800 frw.

Mu mwaka wa 2017 kugeza mu mpera za 2019, nibwo ikigo cyageze ku miryango 570 yose hamwe kibitewemo inkunga na Caritas y’Ubusuwisi ndetse n’ Ikigo cy’igihugu cy’imiyoborere (RGB).

Ati “ ibikorwa byo kwita ku bana bo mu muhanda n’igikorwa kitarangira hatabayeho ubufatanye n’inzego zitandukanye, niyo mpamvu twatumiye inzego za reta n’izumutekano kugirango turebere  hamwe uko twagira umuryango utekanye”.

Padiri Twizeyumuremyio yanagaragaje ko ibibazo biri mu miryango ariyo ntandaro y’ikibazo cy’abana bo mu muhanda, aha yavuze ku ihohoterwa ribera mu ngo, avuga ubukene, ubuharike, ubwumvikane buke hagati y’abasahakanye.

Atanga umuti ko ibibazo biri mu miryango bikemutse ndetse bikagabanuka n’ikibazo cy’abana bo kumuhanda cyarangira ariko hakaba hakenewe ubufatanye bw’inzego zose.

Mu buhamya bwatanzwe n’abahoze barererwa mu kigo cy’Abadacogora-Intwari cya Caritas Kigali Kubwimana Bosco na Kamariza Christine bose bafashijwe kuva mu buzima bwo mu muhanda aba bombi baje no kuvamo umuryango ubu bafite abana 2 bashimiye ababitayeho babakura muri ubwo buzima ubu baka babayeho neza nta kibazo bafite babifashijwemo n’imyuga bize .

Bagaragaje ko nubwo Caritas Kigali yakwita kubana bo mu muhanda ariko hakenewe n’uruhare rwa bose kuko umwana nawe adashatse guhinduka ndetse n’ababyeyi ngo babigiremo uruhare ko bitashoboka .

Umunyamabanga wa Reta ushinzwe imibereho myiza y’abaturage muri Ministere y’ubutegetsi bw’igihugu Nyirarukundo Ignacienne atangaza ko hagomba kubakwa u Rwanda ruzira ubuzererezi ko byashoboka hibanzwe ku mu ryango.

Aha ni naho yabwiye ababyeyi ko batajya basimburwa mu nshingano zabo bagomba kwita ku bana babyaye kuko gutakaza inshingano kwabo nibyo bituma abana babo bajya kuba inzererezi mu muhanda.

Ati “ ndashima Caritas Kigali mu bikorwa byiza byo kwita kuri aba bana, ariko ndasaba aba babyeyi kwita ku nshingano zo kurera ndetse bakabyara abo bashoboye kurere, nkongera kubasaba  guhindura imyumvire kuko sibyiza guhekwa ku mugongo w’undi muntu”.

Minisitiri yasobanuriye ababyeyi ko gufashwa nari byiza ariko batakomeza guhera mu myumvire yuko bazafashwa ubuzima bwabo bwose bagomba nabo gukora bakivana mu bukene cyane ko bafite icyo baheraho mu nkunga bahawe.

Yashimye gahunda Abadacogora-Intwari bakora yo gufasha abana kuva mu muhanda ariko igishimishije ni ukuntu bangera bakabasubiza mu miryango kubafashirizamo kuko uburere bw’ibanze n’urukundo ruhamye barubonera mu miryango.

Nyuma y’ibiganiro bahanye impano y’indabo nka kimwe mu kimenyetso cy’urukundo cyane ko iri huriro ryabaye ku munsi w’abakundana wa St Valentin.

 

Umwanditsi


Byanditswe : tariki ya 16 Gashyantare 2020 saa 00:02:31, ubu
Uwabitangaje : Umwanditsi Mukuru

֩ Ibitekerezo kuri iyi nkuru (0)

Nta gitekerezo kiratangwa kuri iyi nkuru, tanga agatego ube uwa mbere kugira icyo ubivugaho

Umugenzuzi

Funga Amazina:

Ijambo ry'ibanga:

Ohereza igitekerezo

Funga       
     

-
-


B I U URL    :) :( :P :D :S :O :=) :|H :X :-*

Ohereza ifoto (itarengeje 200 kb), ariko si ngombwa

Andika iri jambo ry'igenzura:   5ea7d