Bamwe mu rubyiruko rw’abasore n’abakobwa bafashijwe  n’umushinga w’Abadacogora n’Intwari  bavugako bagiye kubyaza umusaruro amahirwe bagize yo kugira Cartas nk’umubyeyi, ibi babitangaje kuri uyu wa gatanu ubwo bahabwaga bimwe mu bikoresho bizabafasha mu kazi ka bo mu umunsi w’umwana w’umunyafurika kuri centre ya Rweru ho mu karere ka Bugesera.

Imbyino zuje ubutumwa, inyigisho n’amajambo yuje impanuro, ngibyo ibyaranze umunsi mukuru w’umwana w’umunyafurika wizihizwaga kuri uyu wa gatanu tariki 30 Kamena mu kigo cy’Abadacogora n’Intwari kuri centre ya Rweru.

Ni umunsi mukuru waranzwe kandi no guha icyemezo cy’imyitwarire myiza ku basore n’abakobwa 23 barangije amashuri muri 2016 harimo ay’imyuga n’amashuri yisumbuye, ibi kandi byajyanye no kubaha bimwe mu bikoresho by’ibanze bizabafasha gutangira akazi nk’uko bihora  bikorwa ku bana barangiza mu mashuri atandukanye bafashwamo na kino kigo.

Umuyobozi wa Cartas y’arikidioseze ya Kigali Padili Donatien Twizeyumuremyi avuga ko ibikoresho baha runo rubyiruko ari iby’ibanze kugirango babashe kubona intangiriro mu kazi bagiyemo , aha niho uyu muyobozi ahera asaba uru rubyiruko guhera kuri aya mahirwe rugize maze rugakora ibishoboka byose rugakora akazi rugatera imbere nk’uko ariyo ntego ya kino kigo.

Umuyobozi wa Cartas y’arikidioseze ya Kigali Padili Donatien Twizeyumuremyi yasabye urubyiruko kuzakora bakiteza imbere.(photo/Valens)

Padili yagize ati:“ Tubaha ibikoresho bike by’ibanze , bityo namwe mugomba gushaka ibindi bikoresho bindi kugira ngo mubashe gukora akazi kose gashobora kubateza imbere, ntabwo byashoboka ko mwahabwa ibikoresho byose muzakenera ariko twizera ko ibyo tubahaye bizabafasha gukora akazi maze mukabona amafaranga mugatera imbere. Buri wese bitewe n’ibyo yize tumugenera ibyo azakenera, twizeyeko rero ari intangiriro nziza mubonye, ariko n’ubwo mucukijwe ntabwo bivuzeko tubibagiwe n’ubundi tuzakomeza no gufatanya mu buzima busanzwe tubafasha mu iterambere ryanyu nk’umubyeyi”.

Uru rubyiruko rurimo ingeri zitandukanye zirimo abize ibijyanye n’amahoteri, ubudozi, ubukanishi , ubw’ubatsi n’ibindi, uretse aba bize ibijyanye n’imyuga kandi n’abize amashuri yisumbuye nabo bahawe ibikoresho bibafasha kuzakomeza amasomo muri kaminuza.

Abahawe ibikoresho  bavugako bagomba gukora bakiteza imbere.( photo/Valens)

Bamwe mu bahawe ibi bikoresho bavuga ko bishimira cyane iyi ntambwe nziza yindi Cartas y’arikidioseze ibateza mu buzima nyuma yo kubavana mu muhanda, bityo bavuga ko nabo bazabyaza umusaruro aya mahirwe babonye. Ibi Uwihirwe Clemence uhagarariye uru ubyiruko rurangije yabivuze muri aya magambo:

 “ Ntako bisa kuba Cartas uyu mushinga waratuvanye ku  muhanda tukiga ubu tukaba turangije kwiga, ni amahirwe twagize, kandi tugize n’andi yo gufashwa duhabwa bimwe mu bikoresho by’ibanze tuzajyana ku kazi , turabizeza ko natwe tuzakora uko dushoboye tugakora akazi neza nkuko twabyize tugatera imbere”.

Ibi birori kandi byari byitabiriwe n’abayobozi batandukanye bose bagarutse ku ruhare rwa buri wese mu kubungabunga uburenganzira bw’umwana ngo budahonyorwa, Padil Emmanuel wari uhagarariye umushumba w’arikidioseze ya Kigali avuga ko kiriziya Gatorika ihora ikora ibishoboka byose ngo irangize inshingano yayo yo gushaka umukiro wa muntu.

Ati:“ Ni inshingano ikomeye ya Kiriziya gushaka umukiro wa muntu , kandi kiriziya ikora ibishoboka byose itera leta ingabo mu bitugu kugirango ibi bibashe kugerwaho , bityo rero na buri wese cyane cyane ababyeyi bakagombye kumenya ko icya mbere ari uburere bagaharanira kurengera uburenganzira bw’umwana”.

Abayobozi batandukanye bari bitabiriye umunsi mukuru w’umwana w’umunyafurika. Hgati ni Josephine Uwizeye umukozi muri MIGEPROF. (photo/Valens)

Kurengera uburenganzira bw’umwana ni ingingo yagarutsweho cyane muri bino biroro n’abayobozi batandukanye bari bitabiriye bino birori barimo n’umuyobozi muri ministeri y’uburinganire n’iterambere ry’umuryango Josephine Uwajeneza wavuze ko umwana ari nk’urubuto rukenewe kwitabwaho kugirango ejo azigirire umumaro anawugirire n’igihugu, uyu muyobozi kandi yongeyeho ko umuhanda utabyara bityo akaba ari nayo mpamvu utagomba kurere ahubwo umwana wese ko agomba kurererwa mu muryango.

Abadacogora n’intwari ni umushinga wa Cartas y’arikidioseze ya Kigali umaze imyaka isaga 33 wita ku bana batereranwe n’imiryango ku buryo butandukanye bakajya kuba ku mihanda no mu buzererezi, imibare atangwa na kino kigo igaragaza ko muri uyu mwaka wa 2017 uyu mushinga uri gufasha abasaga 510 .

Muri aba bose 54 muri bo biga mu kigo, 365 biga mu mashuri abanza , 33 biga mu mashuri yisumbuye, na 58 mu mashuri y’imyuga .

 Andi mafoto yaranze umunsi mukuru

Umwana yahawe ijambo koko!! , Doyen w'abana baba muri centre ya Rweru avuga ijambo

Josianne Mushashi uyobora abadacogora n'intwari yakira abashyitsi.

 Abize iby'amahoteli bahabwa ibikoresho, bavugako biteguye kuba abayobozi b’igikoni bakinjiza.

Umuyobozi w’umurenge na Josephine wo muri MIGEPROF bakozwe ku mutima n’ubutumwa abana batanga maze barandika.

Ubuzima ni buto, abana babyiniye abantu karahava.

Abize ibyo gusuka bashyikirijwe bimwe mu bikoresho bakenera ngo bazabashe kwita ku bakiriya(care).

“Nta mwana ucika ku mubyeyi n’iypo amaze kumwubakira arakomeza akamwitaho, tuzakomeza tubakurikirane” Padili Donatien